Sa turre de Carbònia
Me in su coro de Carbònia si nde istantàrgiat salianti sa Turre Litòria, testimonia de su passadu de sa citade e, in calincuna manera, de sa fortza de su regìmene fascista in su paisu. Ma custa Turre no est unu monumentu isceti. Est finas un’icona, su prus sìmbulu imponente de s’ammaju de sa citade, un’arruncu de istòria chi caraterizat a manera funguda su sètiu de sa citade.
A intrare in custa Turre bolet nàrrere a torrare a agatare is rastros de unu tempus chi at marcadu pro semper custos logos, is rastros de un’istòria chi non si podet ismentigare.
150 dies de grandiosidade
Arta 27,50 metros, sa Turre de Carbònia dd’ant pesada in 150 dies in su 1938. Est unu grandu fàbbricu solu, cun un’istrutura cumplessa chi si nde istrogat in chimbe pianos.
Su pranu de terra est su logu de su Sacràriu, intregadu a is mortos fascistas, anca si costodiat is sìmbulos litòrios e su retratu de Mussolini. Su bassurilievu de màrmure de s’iscultore Crocetti si podet ammirare pròpiu in custu tretu de sa Turre. In su tzentru, sa Vitòria, sìmbulu de potèntzia e, a inghìriu, bator rapresentatziones allegòricas: su traballu, sa famìlia, sa milìtzia e is organizatziones de su regìmene. Totu imboddiadu in un’atmosfera de mistèriu e de curiosidade chi ti nd’at a pàrrere de torrare a coa in su tempus.
Su primu pianu de sa Turre est su Diretòriu, chi portat unu balcone chi s’aberit subra Pratza Roma. Dae custu balcone su 18 mese de idas de su 1938 Mussolini si fiat incaradu pro inchingiare sa citade noa. In is àteros 4 pianos ddoe fiant is ufìtzios de su fàsciu e de is organizatziones dipendentes.
Sa Turre a pustis de su fascismu
A pustis, cun sa derruta de su fascismu, a manera naturale sa Turre aiat pèrdidu sa funtzione acapiada a su regìmene. In Turre Litòria, a dies de oe abarrant is ufìtzios comunales, ma su fàbbricu sighit semper a amajare is visitadores.
