Caminu de Santa Bàrbara, Santa de is minadores
Giai dae s’antigu sa Sardigna Sud-Otzidentale est unu logu de isproramentu, caminu e iscoberta. Anderas pagu trastigiadas in is annos furriadas a caminos, pro more de is contos de sa gente chi ddos at traessados, finas a nde essire caminos funtzionales pro diferentes atividades de traballu. Peri custas anderas antigas, connotas giai dae su neolìticu antigu, si sunt bènnidas paris tantas popolatziones de su Mediterràneu e de s’Europa. Oe in die, custos caminos etotu si podent torrare a connoschere pròpiu cun su Caminu de Santa Bàrbara, amparadora de is minadores.
Su Caminu: a cumente est fatu e aunde traessat
Su Caminu de Santa Bàrbara est unu itineràriu tzirculare clàssicu chi in su totu mesurat finas 500km. Traessat logos de Sud-Sardigna, de su Sulcis-Igresiente-Arburense-Guspinesu. Sa mègius parte de s’andera passat in moris e bias de sartu. Pagos tretos isceti, mancai curiosos etotu, traessant is istradas imperdadas de is biddas a curtzu e is istradas asfaltadas a curtzu de is biddas. Dae sa cuota de su mare finas a s’artària màssima, cara a 900 mt, peri su padente de Marganai, su Caminu est totu unu àrtzia e cala de cuotas diferentes, ma a su pròpiu tempus est un’andera pro totus, cun pagos passàgios traballosos.
Is tretos
Su Caminu de Santa Bàrbara, cunforma a is caraterìsticas printzipales e a sa disponibilidade de istruturas ritzetivas assentadas peri sa bia, est partzidu in 30 paradas, cara a 16 km s’una dae s’àtera. Is paradas ddas ant pensadas pro escursionistas e pellegrinos a si pòdere istentare visitende is sitos de archeologia clàssica e industriale chi s’agatant peri su Caminu. Cummente si siat, totus si podent isceberare is paradas chi ddi praghent mègius cunforma a su bisòngiu e a sa netzessidade. Faghet a caminare prus lentos o prus lestros cunforma sa punna de s’escursione o de su chi si disìgiat. Faghet a si firmare pro ammirare is paesàgios, is ruinas archeològicas, is minieras e totu is atras bellesas chi su territòriu aparat.
- Tapa 01 – Dae Igrèsias a Nèbida
- Tapa 02 – Dae Nèbida a Masua
- Tapa 03 – Dae Masua a Buggerru
- Tapa 04 – Dae Buggerru a Portixeddu
- Tapa 05 – Dae Portixeddu a Piscinas
- Tapa 06 – Dae Piscinas a Monte Betzu
- Tapa 07 – Dae Monte Betzu a Arbus
- Tapa 08 – Dae Arbus a Perd’e Pìbera
- Tapa 09 – Dae Perd’e Pìbera a Biddacidru
- Tapa 10 – Dae Biddacidru a Monte Mannu
- Tapa 11 – Dae Monte Mannu a Arenas
- Tapa 12 – Dae Arenas a Su Mannau
- Tapa 13 – Dae Su Mannau a Santu Beneditu
- Tapa 14 – Dae Santu Beneditu a Marganai
- Tapa 15 – Dae Case Marganai a Domusnovas – Musei
- Tapa 16 – Dae Musei a Orbai
- Tapa 17 – Dae Orbai a Rosas
- Tapa 18 – Dae Rosas a Nuxis
- Tapa 19 – Dae Nuxis a Santadi
- Tapa 20 – Dae Santadi a Is Zuddas
- Tapa 21 – Dae Is Zuddas a Masainas
- Tapa 22 – Dae Masainas a Candiani
- Tapa 23 – Dae Candiani a Tratalias
- Tapa 24 – Dae Tratalias a Sant’Antiogu
- Tapa 25 – Dae Sant’Antiogu a Carbònia
- Tapa 26 – Dae Carbònia a Nuraxi Figus
- Tapa 27 – Dae Nuraxi Figus a Carloforte
- Tapa 28 – Dae Carloforte a Portescusi
- Tapa 29 – Dae Portescusi a Bacu Abis
- Tapa 30 – Dae Bacu Abis a Igrèsias
