Pratza Roma
Pratza Roma est su coro berdaderu de sa citade de Carbònia. Nàschida pro istrangiare is manifestatziones e is atòbios de sa vida pùblica, si ddoe agatant is prus importantes fàbbricos de sa citade: sa Crèsia de Santu Pontzianu, chi a intro portat sa capella intregada a Santa Bàrbara, sa santa de is minadores, sa Turre Litòria, su Comunu de Carbònia, su Dopolavoro Cine-Teatru e su Pòrtziu de sa Posta.
Sa pratza
Primu elementu pianificadu de sa citade, sa pratza faghet retumbu a s’architetura ratzionalista de su ventènniu fascista, unu retàngulu mannu tancadu cun fàbbricos pùblicos e tretos bòidos chi si ddoe apubat su paesàgiu a fùrriu e is minieras, che cando esseret una terratza manna panoràmica. Funtziones civiles e religiosas si costumant dae semper in custu tretu, chene distintzione. Is istradas e is fàbbricos sunt bene acrobados paris cun atentzione a su detàlliu e coerèntzia estètica intre sa Pratza e is fàbbricos. Sa Pratza s’incarat a pitzus de is giardinos pùblicos puru, ighiriados dae is rugas anca s’aiat pesadu is sedes de is sotziedas carbonìferas.
Pratza Roma at connotu acontzamentos diferentes in su tempus e at bìvidu fases diferente chi s’istòria sighit contende, pro custu est su sìmbulu de unu passadu reghente chi at bìvidu in primu pupa is mudamentos siat istòricos chi sotziales, essendende custa etotu unu rastru de custos passàgios.
